හැත්තෑව හා අසූව දශකවලදී ලොව කලඹා නික්මගිය අසහාය පොප් සංගීත කණ්ඩායමට ආදරය කළ සුවහසක් රසිකයින් එවක් පටන් ගෙවුණු වසර ගණනාවක් පුරා ජීවත්වූයේ සිහිනයක ය. 1983 දී ඔවුන් සීසීකඩව විසුරුවා දැමූ, වෙන්වීම්, දික්කසාද හා නොගැලපීම් පසෙකලා අග්නීතා, බෙනී, (බ)ජෝන්, හා ඇනී-ෆ්‍රීඩ් යළි එකතුවී ලොව කුල්මත් කරනු ඇත යන සිහිනය ඇබා රසිකයින් තුළ තිබිණ. නමුත් එය කිසිදා සැබෑ නොවන බැව් ඇබා ස්ථීර වශයෙන් කියා තිබුණේ වරක් දෙවරක් නොවේ.
“ඇබා ආපහු කවදාවත් එකතු වෙන්නේ නැහැ. එවැන්නක් සිදුවන තුරු බලාපොරොත්තු දල්වාගෙන සිටින රසිකයින් වේදනාවට පත්කරන්න සිද්ධවෙන එක අපිටත් වේදනාවක්“ ඇබා සාමාජික (බ)ජෝන් උල්වියුස් එසේ කියා තිබුණේ 2013 වසරේදි ස්ටොක්හෝම් නුවරදී ‘ඇබා‘ කෞතුකාගාරය විවෘත කිරීමට එක් වෙමිනි. නමුත් සැබෑ නොවන බැව් කී ඒ සිහිනය දැන් හැබෑවී තිබේ. එය ඇබා ගීත ලෝලීන්ද පස්වනක් ප්‍රීතියෙන් ඉපිලවන සුබආරංචියකි. නමුත් එම ප්‍රීතිය දියාරු කරවන පොඩි පරහක්ද නැත්තේම නැත. එක් අතකට එය ඇබාලා දුන් දිවුරුම මුලුමනින්ම වෙනස්ව නැති බවටද ඉඟියකි. වසර තිස්පහකට පසු ඇබා සිය ගීත ලෝලීන්ට නවතම ගීත දෙකක් දායාද කොට තිබේ. ගායනය ඇබාලාගේ වුවද, එම ගීත වේදිකාවේ ඉදිරිපත් කරනු ඇත්තේ ‘ඇබා අවතාර‘ විසිනි.
ඇබාගේ උත්පත්තිය සිදුවූයේ 1972දී ස්වීඩනයේ ස්ටොක්හෝම් නුවරදීය. එහි සාමාජිකයින් වූයේ විවාහක යුවළ දෙකකි. ගීත කෝකිලාවියන් දෙදෙනා වූ ‘අග්නීතා ෆෝල්ට්ස්කෝග්‘, හා ‘ඇනිෆ්‍රීඩ් ලින්ග්ස්ටැඩ්‘ සිය මධුර ගායනයෙන් ලොව සනහද්දී ඔවුන්ට ගීත පබඳමින් පසුබිම් සංගීතය සැපයුවේ ඔවුන්ගේ පිය සැමියන් වූ (බ)ජෝන් උල්වියුස් හා බෙනී ඇන්ඩර්සන් ය. කණ්ඩායම ඇබා ලෙස නම් කෙරුනේද ඔවුන් සිව්දෙනාගේ නම්ල මුලකුරු ( ABBA) එක් කිරීමෙනි. පොප් ගායන ලොවේ ඇබා උච්චස්ථානයට පත්වූයේ 1974දි ඔවුන් ‘යුරෝවිෂන්‘ ගීත තරගාවලිය ජයග්‍රහණය කිරීමත් සමඟය. ඒ සිය ‘වෝටර්ලූ‘ ගීතය හරහාය. 1974 – 1980 අතර කාලයේදී බිල්බෝඩ් ගීත දර්ශකවල අංක එකට පැමිණි ‘Knowing me’, ‘Knowing You’, Take a chance on me’, Dancing Queen’, ‘Name of the Game’, වැනි ගීත ගණනාවක සාඩම්බර හිමිකරුවන් වූයේ ඇබාය. ඔවුන් 1983දී විසිර යාමෙන් පසුව වුවද ඒ ජනප්‍රියත්වය අඩුවක් වූයේ නැත. එදා සිට අද දක්වා අලෙවි වී ඇති මිලියන ගණනක්වූ ඇබා ගීත තැටි ඒ බව ඔප්පු කරන එක් සාක්ෂියක් පමණි.
ඇබා විසිර ගිය පසුවත් ඇබාට පෙම් බිහිවූහ. 1999දී ඇබාගේ කතාව රැගත් ‘මමා මියා‘ සංගීතමය වේදිකා නාට්‍යය වෙස්ට් එන්ඩ්හි ප්‍රදර්ශනය ඇරඹුවේ එහි ප්‍රතිඵලයක් ලෙසයි. අදටද ලොව පුරා ප්‍රදර්ශනය කෙරෙන මෙය නරඹා ඇති රසික පිරිස මිලියන හැට ඉක්මවයි. එය පාදක කර ගනිමින් මෙරිල් ස්ට්‍රීප්, කොලින් ෆර්ත්, ඇමැන්ඩා සෙෆ්‍රීඩ් වැනි සුප්‍රකට හොලිවුඩ් රංගධරයන්ගේ රංගනයෙන් හැඩවී 2008දී තිරගත වූ ‘මමා මියා‘ චිත්‍රපටය බොක්ස් ඔෆීස් වාර්තා තැබුවේද ඒ ජනප්‍රියත්වය නිසාමය. ලබන ජුලි මාසයේදී එහි දෙවන කොටස ‘මමා මියා - හියර් වී ගෝ අගේන්‘ ලෙස තිරයට ප්‍රවිශ්ට වන තෙක් රසිකයෝ නොඉවසිලිමත්ව සිටිති. යළිත් ප්‍රසංග වේදිකාවට එන ලෙසට ඇබාට ඉදිරිපත්වූ ඉල්ලීම් බැහැර කෙරුණේ වරක් දෙවරක් නොවේ. 2000 වසරේදී සජීවි ප්‍රසංගයක් පවත්වන ලෙසට කළ ඇමරික් ඩොලර් බිලියනයක ඇරයුම උල්වියුස් විසින් ප්‍රතික්ෂේප කර තිබුණේ , “ඔයාලට අපි කවදාවත් ප්‍රසංග වේදිකාවේ දකින්න ලැබෙන්නේ නැහැ. එක දෙයක්, අපිට කොහෙත්ම මුදල් අවශ්‍ය නැහැ“ කියමිනි.
නමුත් ඉන්ස්ටර්ග්‍රෑම් ඔස්සේ රසිකයින් සතුටු සාගරයක ගිල්වමින් පසුගියදා හෙළිකළේ නවතම ඇබා ව්‍යාපෘතිය වෙනුවෙන් නැවුම් ගීත දෙකක් පටිගත කළ බවයි. ඉන් එක් ගීතයක් වන “I still have faith in you” ලබන දෙසැම්බරයේදී රූපවාහිනී විශේෂ වැඩසටහනකින් දොරට වඩිනු ඇත. බී.බී.සී. හා එන්. බී.සී. නාලිකා දෙක ඒකාබද්ධව නිර්මාණය කෙරෙන මෙම වැඩසටහන සුවිශේෂී වනු ඇත්තේ ඒ. ඒ වසර තිස්පහකට පසු පළමුවරට ඇබා අලුත්ම ගීත දෙකක් සමඟ ප්‍රසංග වේදිකාවක දක්නට ලැබෙන නිසාම පමණක් නොවේ. ගීත ගායනය කරන්නේ ඇබා සාමාජිකයින්ගේ අවතාර නොහොත් ‘හොලෝග්‍රෑම්‘ ප්‍රතිබිම්බ විසින් වන නිසාය. ඩිජිටල් පරිඝණක තාක්ෂණය මඟින් පරිලෝකනය කෙරුණු ඇබා සාමාජිකයින් සිව්දෙනාගේ වත්මන් ස්වරූපය ඔවුන් 1979දී සිටි ස්වරූපය දැක්වෙන ආකාරයට ‘තරුණ‘ කරවා මෙම හොලෝග්‍රෑම් ප්‍රතිබිම්බ නිර්මාණය කොට තිබේ. ඒ අනුව ගීතය ගයන්නේ ඇබාය. නමුත් එය ඉදිරිපත් කරන්නේ ඇත්තම ඇබා නොවේ.
රූපවාහිනී වැඩසටහනෙන් පසු ලබන වසරේ සිට මෙම හොලෝග්‍රෑම් ඇබා කණ්ඩායම ලෝක සවාරියකද නිරතවීමට නියමිතය. එය සැබවින්ම අතතථ්‍ය යථාර්ථය ( Virtual reality ) නමැති තාක්ෂණික විප්ලවයේ පෙරළිකාර කඩඉමක් වනවාට සැක නැත. නමුත් ඇබාට පෙම් බැඳි රසිකයින් මෙබඳු අත්දැකීමක් කෙසේ වැලඳගනු ඇත්ද යන්නට ඇත්තේ ප්‍රශ්නාර්ථයකි.
“අවුරුදු තිස්පහකට පස්සේ ආයෙත් එකට එකතු වෙලා ගීතයක් පටිගත කරන්න ශබ්දාගාරයකට යන්නට ලැබෙන එක විනෝදයක් කියලයි අපිට දැනුණේ. ඉතිං අපි එහෙම කළා. ඇත්තටම ඒක හරිම විනෝදජනක අත්දැකීමක්. අපි වෙන්වෙලා මෙතරම් කාලයක් ගතවෙලා කියලා අපිට නිකමටවත් හිතුණේ නැහැ. අපි වයසට ගිහිල්ලා වෙන්න පුළුවන්. හැබැයි අපේ ගීතය අලුත්. ඒක අලුත්ම අත්දැකීමක්.“
මෙම අරුම පුදුම ව්‍යාපෘතිය ගැන ඇබාලා අදහස් දක්වා තිබුණේ එලෙසය. ඇබාලා කවදත් සිය රසිකයින්ට තිළිණ කළේ පුදුමයන් ය. මමා මියා වේදිකා නාට්‍යයත්, ඊළඟට එහි චිත්‍රපටයත් ජාත්‍යන්තරය කලඹන උන්මාදයක් බවට පත්වත්දී හෝ ඒ වෙනුවෙන් වචනයක් කියන්නට හෝ ඇබාලා ඉදිරිපත්වූයේ නැත. ඒවායේ ආරාධිත රංගනයකටවත් ඉදිරිපත් වූයේ නැත. නමුත් ඇබා ගීතවල වටිනාකම හෝ ජනප්‍රියත්වය බාල්දු වූයේ නැත. ඒවායේ මිහිර සදාකාලිකය.
ඇබා පුනරාගමනය ‘පොප් ජස්ටිස්‘ වෙබ් අඩවියේ කතෘ ‘පීටර් රොබින්සන්‘ හඳුන්වා දුන්නේ විසිඑක්වන සියවසේ දැවැන්තම පොප් ප්‍රවෘත්තිය ලෙසයි. “අලුත් ගීතයක් පටිගත කරන්න ඇබාලා දිගින් දිගටම ප්‍රතික්ෂේප කිරීම එක ගැන ගොඩක් රසිකයින් ආඩම්බර වුණේ හිතේ කැමැත්තකින් නොවෙයි. අපි හැමෝම දවල් හීන දැක්කා අනාගතයේ දවසක, නිවැරදි කාලයේදී, නිවැරදි තත්ත්ව යටතේ, නිවැරදි හේතු නිසා එයාලා ඒ තීරණය වෙනස් කරාවි කියලා.
දැන් සිද්ධවෙලා තියෙන්නේ ඒකයි. ඒක ඇත්තටම පොප් කලාවේ ප්‍රාතිහාර්යයක්!“
රුක්ලන්ති පෙරේරා
