සමුගත් බක්මහ උළෙල

දැන්වත් ඉතිං කොවුලෝ
නවතන්න ඔය සවුදම්
සොයා ගන්නට කාලයයි
කුලියට කාක කැදැල්ලක්

පුපුරයි අසනි නුබගැබ
හෙළන්නට මොර ගෙඩි වැසි
සේදිය යුතුය මේ බිම
කූට වෙළඳුන් දුලි කුණු

බහලනු සොඳා රබාන
කෝඳුරු පිරුණු අටු මත
ගයලා සුරල් නව පද
එෆ්. එම්. කෙවිළියෝ සුකුමොළ

රත් පැහැ එරබදුව විළිවැද
මියගිය බඳු ය කටු මත
මැයි මල් පිපේ නිසැක ව
වෙසඟෙහි වෙළෙඳ සිරි ගෙන

කනකර දුලන අබරණ
කරගල ගගා ක්ෂය වුණ
නෙක නෙක තිළිණ වරදන
පුද දෙති බැංකු සුජනන

තුන් කුදුව නැග බස් මත
දිව යනු යෙහෙකි වැඩ බිම
දින දසුන පිරි කොටු මත
දින සති දුකින් වැලපෙන