මිනින්දෝරු මහත්තයෝ මෙන්න පරණ පැලෑන
ගෙයි ගින්දර පිටට ගිහින් ඇවිළෙයි ගම් තුලාන
ලජ්ජාවෙන් අසරණ වී වැටුණා හිත තලාන
පුතාලගේ තාත්ත ඇති මං එනතුරු බලාන
ලොකු දුව සටනකි ඉල්ලා ගෙය ඇති කොටසම
ඇය යව්වනයෙදි දුන් දුක ගෙනවිත් එලෙසම
සහෝදරත්වය මිය යති පණ නැති වැටටම
විසකුරු උරගයෝ ඇදෙති ඉනි වැට දිගටම
පාලුව හුදකලාව පිරි අඳුරු සසර මඟ
පය ඉදිමෙයි ජීවිතයේ නිසරු කන්ද නැඟ
මහගෙදරට රණ්ඩු වෙලා විසිරුණ සිව් දිග
කැඳ උගුරක්වත් පොවන්න දරුවන් නැත ළඟ
ලේ කිරි කර පෙව්ව පිනට මවකට ප්‍රති උපකාරය
දුරකථනය පුපුරන්නේ දරු මුනුපුරු උපහාරය
ලේ නෑයන් දෙන ඔවදන් මහමෙර සේ බරසාරය
ඔප්පු ලියල ඔප්පු කරමු අපට උරුම මහපාරය
මහ පොළවම උදව් කළත් අපට පැලක් හදාගන්න
තුන් හිතකින්වත් නොසිතමි මුළු පොළවම බදාගන්න
හතර රියන මැද සුවසේ සැහැල්ලුවෙන් නිදාගන්න
මගෙ දරු සෙනෙහස නොබෙදා අපේ ඉඩම බෙදා දෙන්න
